સુદાનમાં ભૂસ્ખલનમાં ઓછામાં ઓછા એક હજાર લોકો મૃત્યુ પામ્યા છે. આ બધા લોકો એક જ ગામના રહેવાસી હતા. સુદાન લિબરેશન આર્મીએ સોમવારે જણાવ્યું હતું કે પﾍમિ સુદાનના મરા પર્વતીય પ્રદેશમાં એક ગામ ભૂસ્ખલનથી સંપૂર્ણપણે નાશ પામ્યું હતું. આનાથી ગામમાં રહેતા લગભગ એક હજાર લોકો માર્યા ગયા. આ અકસ્માત પછી, આખા ગામમાં ફક્ત એક જ વ્યક્તિ જીવિત બચી છે.
અબ્દેલવાહિદ મોહમ્મદ નૂરના નેતૃત્વ હેઠળના જૂથે એક નિવેદનમાં જણાવ્યું હતું કે ૩૧ ઓગસ્ટે ભારે વરસાદ પછી ભૂસ્ખલન થયું હતું. આનાથી ગામ સંપૂર્ણપણે જમીનદોસ્ત થઈ ગયું છે. સુદાનમાં આ કુદરતી આફત અફઘાનિસ્તાનમાં ભૂકંપ પહેલા આવી હતી. અફઘાનિસ્તાનમાં ૩૧ ઓગસ્ટની રાત્રે ૬ ની તીવ્રતાના ભૂકંપે ભારે વિનાશ મચાવ્યો છે. આ ભૂકંપમાં દેશમાં ૮૦૦ થી વધુ લોકોના મોત થયા છે.
દારફુર ક્ષેત્રમાં સ્થિત આ વિસ્તારને નિયંત્રિત કરતી ચળવળે પીડિતોના મૃતદેહ મેળવવા માટે સંયુક્ત રાષ્ટ્ર અને આંતરરાષ્ટ્રીય સહાય એજન્સીઓને મદદ માટે અપીલ કરી છે. માર્યા ગયેલાઓમાં મોટી સંખ્યામાં મહિલાઓ અને બાળકોનો સમાવેશ થાય છે.
ઉત્તર દારફુર રાજ્યમાં સુદાનની સેના અને અર્ધલશ્કરી રેપિડ સપોર્ટ ફોર્સિસ (RSF) વચ્ચે ચાલી રહેલા યુદ્ધથી ભાગીને રહેવાસીઓએ મરા પર્વતીય પ્રદેશમાં આશરો લીધો છે. અહીં ખોરાક અને દવાઓના અભાવે લોકો મુશ્કેલીઓનો સામનો કરી રહ્યા છે.
સુદાનમાં છેલ્લા બે વર્ષથી ચાલી રહેલા ગૃહયુદ્ધને કારણે, અડધાથી વધુ વસ્તી ભૂખમરાના સંકટનો સામનો કરી રહી છે. આ કારણે, લાખો લોકો તેમના ઘરમાંથી બેઘર થઈ ગયા છે. ઉત્તર દારફુર રાજ્યની રાજધાની અલ-ફાશીર પર પણ સતત ગોળીબાર થઈ રહ્યો છે.
