ગઇકાલે જાહેર થયેલા ચાર રાજયોના ચૂંટણી પરિણામોની અસર પણ બજાર પર જોવા મળી છે અને પ્રી-ઓપન સેશનમાં જ શેરબજારમાં જોરદાર ઉછાળો જોવા મળ્યો છે. એક તરફ, બોમ્બે સ્ટોક એક્સચેન્જનો ૩૦ શેરનો ઈન્ડેક્સ સેન્સેક્સ (BSE સેન્સેક્સ) ૯૫૪ પોઈન્ટ ઉછળ્યો હતો, જયારે નેશનલ સ્ટોક એક્સચેન્જનો નિફટી (NSE નિફટી) પણ ૩૩૪ પોઈન્ટના વધારા સાથે ટ્રેડ થઈ રહ્યો હતો. બજાર ખુલતાની સાથે જ સેન્સેક્સ અને નિફટીએ નવા રેકોર્ડ સ્તરને સ્પર્શ કર્યો હતો. પહેલાથી જ નિષ્ણાતો અપેક્ષા રાખતા હતા કે ત્રણ રાજયોમાં ભાજપની જંગી જીતની અસર શેરબજારમાં ફાયદાના રૂપમાં જોવા મળી શકે છે.
પ્રી-ઓપન સેશનમાં જોરદાર ઉછાળા બાદ ભારતીય શેરબજારનો મુખ્ય સૂચકાંક નિફટી સવારે ૯.૧૫ વાગ્યે નવા રેકોર્ડ ઊંચાઈએ ખૂલ્યો હતો. નિફટી ૨૭૬.૪૦ પોઈન્ટ અથવા ૧.૩૬ ટકાના વધારા સાથે ૨૦,૬૦૦ ના સ્તર પર ખુલ્યો. નિફટી પર અદાણી એન્ટરપ્રાઈઝ, અદાણી પોર્ટ્સ, એનટીપીસી, એસબીઆઈ અને એલએન્ડટી કંપનીઓના શેરમાં મજબૂત વધારો જોવા મળ્યો હતો.
શરૂઆતના વેપારમાં સૌથી મોટો ઉછાળો અદાણી ગ્રૂપની મુખ્ય કંપની અદાણી એન્ટરપ્રાઈઝના શેરમાં જોવા મળ્યો હતો, જે ૭.૦૪ ટકા અથવા રૂ. ૧૬૬.૩૦ના તોફાની વધારા સાથે રૂ. ૨,૫૨૯.૦૦ પર પહોંચ્યો હતો.
બીજી બાજુ, જો આપણે BSE સેન્સેક્સ વિશે વાત કરીએ, તો આ ઇન્ડેક્સ ૮૮૨.૩૮ પોઇન્ટ અથવા ૧.૩૧ ટકાના ઉછાળા સાથે ૬૮,૩૬૩.૫૭ ના સ્તર પર ખુલ્યો. બજાર ખુલતાની સાથે જ લગભગ ૨૧૯૪ શેરમાં ઉછાળો જોવા મળ્યો હતો, જયારે ૨૫૯ શેર લાલ નિશાનમાં ખુલ્યા હતા, જયારે ૧૧૯ શેરમાં કોઈ ફેરફાર જોવા મળ્યો નહોતો.
શેરબજારમાં ટ્રેડિંગની માત્ર ૧૦ મિનિટમાં જ સેન્સેક્સે ૧૦૦૦ પોઈન્ટથી વધુનો ઉછાળો નોંધાવ્યો હતો. સમાચાર લખાય છે ત્યાં સુધી સેન્સેક્સ ઈન્ડેક્સ ૧,૦૩૨.૭૫ પોઈન્ટ અથવા ૧.૫૩ ટકાના વધારા સાથે ૬૮,૫૧૩.૯૪ ના સ્તર પર ટ્રેડ કરી રહ્યો હતો. આ સમયગાળા દરમિયાન, નિફટી બેંકનો ઉત્સાહ પણ ઉચ્ચ સ્તરે જોવા મળ્યો હતો અને તે ૯૭૦.૬૦ પોઈન્ટ અથવા ૨.૧૭ ટકાના ઉછાળા સાથે ૪૫,૭૮૪.૮૦ ના સ્તરે ટ્રેડ થઈ રહ્યો હતો.
શેરબજારમાં ચૂંટણીની અસરના સંકેતો પહેલેથી જ દેખાઈ રહ્યા હતા. છેલ્લા ટ્રેડિંગ સપ્તાહના છેલ્લા દિવસે શુક્રવારે સેન્સેક્સ-નિફટી મજબૂત ઉછાળા સાથે બંધ થયા હતા. સેન્સેક્સ ૪૯૨.૭૫ પોઈન્ટ અથવા ૦.૭૪%ના વધારા સાથે ૬૭,૪૮૧.૧૯ ના સ્તર પર બંધ થયો. બીજી તરફ, NIFTY-૫૦ ૧૩૪.૭૫ પોઈન્ટ અથવા ૦.૬૭%ના વધારા સાથે ૨૦,૨૬૭.૯૦ ના સ્તર પર બંધ થયો.
પાંચ રાજયોમાં યોજાયેલી ચૂંટણી અને ચૂંટણીના પરિણામો આવી રહ્યા છે તે વચ્ચે છેલ્લા કેટલાક દિવસોમાં સ્ટોક માર્કેટ સેન્સેક્સ અને નિફટીએ પણ નવી ઊંચાઈ હાંસલ કરી છે. ૧ ડિસેમ્બર, ૨૦૨૩ ના રોજ, નિફટી ફરી એકવાર તેના સર્વકાલીન ઉચ્ચ સ્તરે ગયો. આ પહેલા ૨૯ નવેમ્બરે સેન્સેક્સે નવો ઈતિહાસ રચ્યો હતો. વાસ્તવમાં, BSEના માર્કેટ કેપ ૪.૧ ટ્રિલિયન ડોલર અથવા રૂ. ૩,૩૩,૨૬,૮૮૧.૪૯ કરોડ સુધી પહોંચી ગયું હતું અને આ સાથે ભારતીય શેરબજાર ટોપ-૫ બજારોની યાદીમાં સામેલ થઈ ગયું છે.
